Tímamótasamningur GA, KA og Þórs

Formenn félaganna við undirritun
Formenn félaganna við undirritun

Nú í dag undirrituðu forsvarsmenn Golfklúbbs Akureyrar, Knattspyrnfélags Akureyrar og Íþróttafélagsins Þórs undir samstarfssamning sín á milli.

Samstarfssamningur þessi felur í sér að GA mun annast allt viðhald á knattspyrnuvöllum félaganna næstu fimm árin (endurskoðunarákvæði er eftir fyrsta árið).  Í þessu felst allur sláttur  sem og allt annað viðhald á völlunum.  GA hefur undanfarin ári veitt bæði KA og Þór ýmsa ráðgjöf og þjónustu á sviði viðhalds, þannig að samningurinn er rökrétt framhald af því samstarfi.

Aukin gæði valla og bætt nýting fjármuna

Það er von okkar og vissa að þessi samvinna félagana muni skila sér í bættum gæðum og viðhaldi á íþróttavöllum félaganna.  Enn fremur er markmið með samningnum að stuðla að bættri nýtingu á tækjakosti og mannskap yfir sumartímann. 

Þarna leiða saman hesta sína þrjú af stærstu íþróttafélögum Akureyrar og væntum við mikils af samstarfi þessu á næstu árum.

Á meðfylgjandi mynd má sjá formenn félaganna, Hrefnu Torfadóttur, Sigmund Ófeigsson og Árna Óðinsson undirrita samstarfssamninginn.