Mót og þriðjudagsspil

 

Þriðjudagsspil GA 2022

 Spilað flest alla þriðjudaga í sumar. Tilgangur spilæfingar er að gera iðkendur betri í því að umgangast völlinn og meðspilara af virðingu, skora út á velli, undirbúa þau fyrir mót og mismunandi leikfyrirkomulag í golfi.

  • Skráningarfresti fyrir þriðjudagsspil á Jaðri lýkur kl.17 á föstudegi fyrir mótið.
    • Skráning til þess að spila á Jaðri fer fram á Golfbox. Leiðbeiningar er að finna inná golf.is/golfbox/ 
    • Leikið er 6-18 holur á Jaðri í flokki 14 ára og yngri og 15 ára og eldri.  Það fer eftir getu hvers og eins hve mikið þau spila.
    • Þeir aðilar sem ætla að spila á Dúddisen þurfa ekki að skrá sig, þjálfarar taka það niður við mætingu og setja aðila saman í holl.
    • Leikið er 2 hringi á Dúddisen, einn hring á hvoru teigasetti.
    • Til þess að fá að spila á Jaðri þarf að vera búið að skila inn 3 hringjum á 30 höggum eða minna á aftari teigum á Dúddisen og það þarf einhver annar aðili að telja skorið og kvitta undir skorkortið sem ritari til þess að staðfesta skorið hjá viðkomandi.

 

Akureyrarmót GA - Allir með!

  • 6 - 9.júlí spila 15 ára og eldri í sínum forgjafarflokki.
    • Verðlaunaafhending á lokahófi GA 9.júlí.
  • 10-12.júlí spila 14 ára og yngri í eftirfarandi flokkum:
    • Byrjendur á Dúddisen
    • 10 ára og yngri 3x6 holur á Jaðri
    • 12 ára og yngri 3x9 holur á Jaðri
    • 14 ára og yngri 3x9-18 holur á Jaðri, þjálfarar ákveða blönduna á spiluðum holum hvort það séu 9 eða 18 holur
    • Verðlaunaafhending fljótlega eftir spil 12.júlí.

 

Sunnudagsmótaröð barna- og unglinganefndar GA

  • Leikið er seinnipart á sunnudögum, ræst út í kringum kl.16 (eftir birtuskilyrðum þegar líða fer á haustið). 
  • Mótin eru fjögur talsins, eitt í hverjum mánuði frá júní fram í september.
  • Dagsetningar í sumar eru eftirfarandi; 19.júní - 24.júlí - 7.ágúst og 11.september.

 

Norðurlandsmótaröðin 2022

Sérstök mótaröð er starfrækt á Norðurlandi fyrir börn og unglinga á aldrinum 6-18 ára og er kjörin vettvangur til að stíga sín fyrstu skref í keppnisgolfi.  Auk Golfklúbbs Akureyrar koma Golfklúbburinn Hamar, Golfklúbbur Ólafsfjarðar og Golfklúbbur Sauðárkróks að mótaröðinni. 

Keppt er í eftirfarandi flokkum: Byrjendaflokkur, 12 ára og yngri, 13-14 ára, 15-16 ára, 17-18 ára.  Í byrjendaflokki er boltinn tekinn upp ef búið er að slá 9 högg og skrifað 10 á skorkortið.

Skráning fer fram á Golfbox og lýkur kl.12 daginn fyrir mót.

Dagsetningar eru eftirfarandi:

  • 12. júní GSS (Sauðárkrókur)
  • 3. júní GHD (Dalvík)
  • 26. júní GFB (Ólafsfirði)
  • 15. ágúst GA

Nánari upplýsingar um mótaröðina er að finna á Facebook hópnum Norðurlandsmótaröðin í golfi: https://www.facebook.com/groups/830641210403482/

 

GSÍ Mótaröð Barna og Unglinga og Áskorendamótaröð Barna og Unglinga

Golfsamband Íslands stendur fyrir og skipuleggur árlega 5 mót fyrir börn og unglinga. 144 efnilegustu kylfingar landsins í barna- og unglingaflokkum keppa um sigur í þremur mismunandi aldursflokkum í flokki drengja og stúlkna, á hveju móti: 14 ára og yngri, 15-16 ára og 17-18 ára.

Samhliða GSÍ Mótaröð Barna og Unglinga er GSÍ Áskorendamótaröð Barna og Unglinga sem er mótaröð þeirra kylfinga sem ekki hafa nógu lága forgjöf til að komast inn á aðalmótaröðina.

Hér eru drög að mótaskrá GSÍ 2022

 

Hópferðir í GSÍ mótaröð unglinga

  • Verð 12.500.kr og nýti iðkandi sér einhvern hluta ferðarinnar greiðir hann fullt gjald
  • Innifalið er rúta, mótsgjald og gisting
  • Farið á fimmtudagsmorgni
  • Komið heim á sunnudagskvöldi
  • 7 iðkendur þarf til þess að fara í hópferð
  • Foreldri fari sem fararstjóri og keyri bílinn

 

Íslandsmót Golfklúbba (Sveitakeppni) GSÍ 2022 

Íslandsmót golfklúbba í barna- og unglingaflokkum fer fram dagana 22-24. júní hjá 14 ára og yngri, 15-16 ára og 17-18 ára. og 2-4. september hjá 19-21árs og 12 ára og yngri.
Leikið er í 5 flokkum á 6 stöðum. 6 leikmenn skipa hverja sveit en 4 spila hverja umferð. 
Val í sveitirnar er í höndum þjálfara GA.

Hver klúbbur sem sendir leikmenn á mótið skal tilnefna liðsstjóra. Liðsstjóri skal gæta hagsmuna keppenda viðkomandi klúbbs og koma fram fyrir þeirra hönd gagnvart mótsstjórn, þó ekki umfram það sem golfreglur heimila. Liðsstjóri skal fyrir hönd viðkomandi klúbbs vera ábyrgur fyrir greiðslu þátttökugjalds.

Í Íslandsmóti golfklúbba 12 ára og yngri mega sveitir vera skipaðar drengjum eingöngu, telpum eingöngu eða vera blandaðar báðum kynjum.  

Leikið verður eftir PGA Junior League fyrirmyndinni, sem kallast PGA krakkagolf á Íslandi.

Hver sveit skal skipuð að lágmarki 4 leikmönnum og að hámarki 6 leikmönnum.

Leiknar eru 9 holur í hverri umferð með Texas Scramble fyrirkomulagi, sem skiptast upp í þrjá þriggja holu leiki. Hver þriggja holu leikur gefur eitt flagg.

Liðsstjóri ákveður tvo keppendur sem hefja leik og jafnframt raðar niður varamönnum ef einhverjir eru í liðinu. Hver keppandi verður að leika að minnsta kosti eitt flagg (3 holur).

Hver viðureign tveggja klúbba gefur 1 stig því liði sem sigrar. Alls eru 6 flögg í pottinum og það lið sem leikur á færri höggum samtals hvern þriggja holu leik vinnur það flagg. Það lið sem vinnur fleiri flögg samtals vinnur viðureignina og eitt stig. Ef lið leika þriggja holu leik á jafn mörgum höggum fær hvort lið hálft flagg. Ef lið skilja jöfn með 3 flögg fær hvort lið hálft stig.

Hver ráshópur verður að hafa einn fullorðinn einstakling sem heldur utan um skorið.

Kylfuberar eru ekki leyfðir.

Keppninni er skipt upp í deildir, sem að hámarki geta orðið fjórar miðað við að leikið sé á 9 holu velli. Í hverri deild eru 6 sveitir og skal raða í deildir eftir forgjöf fjögurra forgjafarlægstu kylfinganna í hverri sveit.

Sex forgjafarlægstu sveitirnar fara í Hvítu deildina, næstu í Gulu deildina, næstu í Bláu deildina og loks í Rauðu deildina. Þó getur hver klúbbur aðeins verið með eina sveit í hverri deild. Þegar ljóst er hvaða sveitir skipa hverja deild skal draga um númer (1-6) hverrar sveitar í deildinni.

Sækja má um heimild til mótsstjórnar um að tveir eða fleiri klúbbar sendi sameiginlega sveit til keppni af sama landssvæði ef ekki reynist unnt að manna sveit til keppninnar.

Aldur miðast við almanaksár.

Mæti ekki lið sem tilkynnt hefur þátttöku til leiks á auglýstum tíma, hvort sem er í fyrstu eða síðari umferðum, skal sveitin sæta frávísun í heild. Úrslit leikja sem hún hefur leikið fyrr í keppninni falla niður og hafa þar af leiðandi ekki áhrif á úrslit mótsins, að undanskildu því að úrslit skulu standa ef öllum leikjum í riðlum er lokið.

Keppnin er leikin á eftirfarandi hátt:

Fyrsti keppnisdagur: Fyrsta umferð leika lið 1 gegn 2; 3 gegn 4; 5 gegn 6.

Fyrsti keppnisdagur: Önnur umferð leika lið 1 gegn 4; 3 gegn 6; 2 gegn 5.

Annar keppnisdagur: Þriðja umferð leika lið 1 gegn 3; 2 gegn 6; 4 gegn 5.

Annar keppnisdagur: Fjórða umferð leika lið 1 gegn 6; 2 gegn 4; 3 gegn 5.

Þriðji keppnisdagur: Fimmta umferð leika lið 1 gegn 5; 2 gegn 3; 4 gegn 6.

Ef þátttökufjöldi sveita er færri en 4 skal leita leiða til að sveitirnar leiki í hverri umferð engu að síður, innan sinnar deildar.

Það lið sem vinnur flest stig vinnur sína deild og fær titilinn Deildarmeistari viðkomandi deildar. Það lið sem hlýtur flest stig í Hvítu deildinni fær titilinn Íslandsmeistari golfklúbba. Hljóti tvö lið jafnmörg stig í efsta sæti ræður innbyrðis viðureign. Ef innbyrðis viðureign var jöfn eða ef fleiri en tvö lið fá jafnmörg stig, fær það lið sem vinnur fleiri flögg efra sætið.