Golfhöllin opnar á morgun

Á morgun, miðvikudaginn 25/10, munum við formlega opna Golfhöllina okkar fyrir veturinn.

Opnunartími Golfhallarinnar fram að áramótum verður sem hér segir:
Virkir dagar: 9:00 - 20:00   (Síðasta bókun í herma hefst kl. 20:00)
Helgar: 10:00 - 17:00   (Síðasta bókun í herma hefst kl. 17:00)

Eins og áður býður Golfhöllin uppá tvo fullkomna golfherma þar sem hægt er að spila marga af bestu golfvöllum heims. 
10 nýjir og skemmtilegir vellir hafa bæst við í hermana frá því í fyrra sem verður gaman að kynnast betur. 
10% opnunar-afsláttur verður af öllum á tímakortum í hermana út nóvember mánuð.

Ýmislegt hefur verið gert til að bæta aðstöðuna, t.d. komin ný borð og stólar, hermarnir uppfærðir, s.s. forritin, nýjar mottur, perur í skjávörpum o.fl. Púttvöllurinn og teppið inní hermunum hefur allt verið djúphreinsað og ný eldhúsinnrétting verður sett upp von bráðar í kaffistofunni, svo eitthvað sé nefnt.  Að venju verður hægt að koma og horfa á golf sem og aðrar íþróttir í sjónvarpinu.  

Einnig munum við hafa 30% afslátt af öllum GA merktum FJ fatnaði, sem verður til sölu í Golfhöllinni. Mikið úrval af bæði karla- og kvennafötum.

 

Hægt verður að koma í kennslu í allan vetur í Golfhöllinni, sem og í Klöppum (sem verður opið áfram eins og hægt er), bæði hjá Sturlu (sturla@gagolf.is) og Stefaníu (stefania@gagolf.is) og verða fastir tímar í boði eins og áður og verður það auglýst sérstaklega innan skamms.

Við viljum líka biðja alla GA félaga um að taka tillit til æfinga barna og unglinga sem fara fram á tímanum 15:00-17:00 alla virka daga í aðstöðunni og sýna því skilning að aðgangur að púttvello og sláttubásum getur verið takmarkaður á þessum tímum.

Höfum það notalegt saman í vetur!
Velkomi í Golfhöllina!