GA heldur árlega margar tegundir golfmóta, sem skipt eru niður í ákveðna flokka. Almenn mót eru opin öllum
félagsmönnum golfklúbba innan GSÍ, en innanfélagsmót eru aðeins opin félögum í GA. Kvennamót eru eins og nafnið gefur
til kynna aðeins opin konum og herramót aðeins körlum. Öldungamót eru fyrir kylfinga sem hafa náð ákveðnum aldri. Loks eru
unglingamót fyrir unglinga 18 ára og yngri, en þeim er oft skipt enn frekar eftir aldri innan fyrrgreindra marka (16-18 ára, 14-15 ára, 13 ára og yngri
o.s.frv.).
Fyrirkomulag móta getur verið ýmiskonar, en eftirfarandi eru það algengasta.
Höggleikur
Höggleiksmót fara þannig fram að högg keppenda eru talin og sá keppandi sem slær fæst högg sigrar. Höggafjöldi er iðulega miðaður við par viðkomandi vallar, þannig að leikmaður sé undir pari, á pari, eða yfir pari. Höggleikur er einnig leikinn með forgjöf, en þá er vallarforgjöf dregin frá höggafjölda.
Stærsta höggleiksmót GA er Akureyrarmótið (Meistaramót GA), þar sem klúbbmeistarar eru krýndir. Enn fremur eru sérstakar mótaraðir fyrir bæði fullorðna og unglinga á Norðurlandi þar sem spilaður er höggleikur.
Punktakeppni
Punktakeppni fer þannig fram að punktar kylfinga eru taldir á hverri holu og sá sem fær flesta punkta á hringnum sigrar. Punktarnir eru þannig reiknaðir á hverri holu að einn punktur fæst fyrir skolla (bogie), tveir fyrir par, þrír fyrir fugl (birdie), fjórir fyrir örn (eagle) o.s.frv. Algengast er að punktakeppni sé spiluð með forgjöf, þó punktakeppni án forgjafar sé einnig þekkt.
Mörg mót með þessu fyrirkomulagi eru á mótaskrá GA.
Holukeppni
Í holukeppni keppa tveir einstaklingar (tvímenningur) eða tvö lið (fjórmenningur) þar sem sá vinnur sem vinnur fleiri holur á hringnum. Í holukepnni getur leikurinn klárast áður en hinar hefðbundnu 18 holur hafa verið leiknar, því staðan getur verið þannig að annar einstaklingurinn eða liðið geta átt fleiri holur en fjöldi þeirra holna sem eftir eru.
Árlega er krýndur holumeistari GA, en keppnin teigir sig yfir stærstan hluta sumarsins. Sveitakeppni GSÍ er einnig spiluð eftir þessu fyrirkomulagi, en GA sendir sveitir bæði í flokki fullorðinna og unglinga.
Texas Scramble
Í Textas Scramble leika tveir leikmenn saman í liði. Leikurinn fer þannig fram að báðir leikmenn slá af teig og velja síðan betra teighöggið. Því næst slá báðir af þeim stað og velja svo aftur betra höggið. Þannig gengur leikurinn þar til einn bolti er kominn í holuna. Texas Scramble er oft spilað með forgjöf (algengt er að forgjöf leikmanna sé lögð saman og deilt í með fimm) og hefur fyrirkomulagið notið mikilla vinsælda á undanförnum árum, enda eru mörg af fjölmennustu mótum golfklúbba einmitt Texas Scramble mót.
Verslunarmannahelgarbomba GA er vinsælt mót sem spilað er eftir þessi fyrirkomulagi. Liðakeppni GA Am/Am er einnig spiluð eftir fyrirkomulagi sem líkist Textas Scramble, en þar eru þó fjórir í hverju liði.
Betri bolti
Tveir leikmenn leika saman í betri bolta. Báðir leika sínum bolta á hverri holu eins og um hefðbundinn höggleik eða punktakeppni sé að ræða. Hins vegar er aðeins betra skorið á hverri holu skráð á skorkortið og kemur þaðan heitið Betri bolti. Líkt og Texas Scramble er þetta mjög vinsælt fyrirkomulag, þar sem hjón, vinir og fleiri nýta tækifærið til að spila gott golf í góðum hópi.
Í Mitsubishi Open, sem er eitt stærsta mót GA á hverju ári, er spilaður Betri bolti.